१४ बैशाख २०७९ मकवानपुरगढी गाउँपालिका कृषि विकास शाखाको आयोजनामा दुइ दिने कृषि प्राविधिकहरुको क्षमता अभिवृद्वि तालिम आज सम्पन्न भएको छ । गत १२ गते देखि शुरु भएको तालिममा मकवानपुरगढी गाउँपालिकाका हरेक वडामा कार्यरत कृषि प्राविधिकहरुको सहभागीता रहेको थियो 
।मकवानपुरगढी गाउँपालिका वडा नं. ६ बाग्दलीमा रहेको माटो परिक्षण प्रयोगशालामा संचालन गरिएको तालिममा विशेष गरि माटो विश्लेषण सम्बन्धी र समय सापेक्ष बालीविरुवामा लाग्ने रोगकीरा पहिचान, रोकथामका उपायहरु, वीउ उत्पादन प्रविधि, कार्यक्रम कार्यान्वयन, अनुगमन निरीक्षण, प्रतवेदन लेखन लगायतका विषयमा प्रशिक्षण दिइएको हो । तालिममा माटो विज्ञ रामदुलार यादव र कृषि अधिकृत चन्द्रकान्त चौधरीले प्रशिक्षण दिनु भएको हो ।
बागमती प्रदेश सरकार, कृषि मन्त्रालयको सहयोगमा २०७६ सालमा स्थापना भएको माटो परिक्षण प्रयोगशाला निरन्तर संचालनमा रहेको छ । मकवानपुरगढी गाउँपालिकाका कृषकहरुलाई माटो परिक्षण सेवा उपलब्ध गराउदै आईरहेकोमा अगामी वर्षदेखि अन्य पालिकाका कृषकहरुलाई समेत माटो परिक्षण सेवा उपलब्ध गराउने लक्ष्य रहेको कृषि अधिकृत चौधरीले जानकारी दिनु भयो । आवश्यकता अनुसार soil kit box बाट पनि माटो परिक्षण शिविर संचालन गरिने जनाइएको छ । 
