हेटौंडा । नेपाली कम्युनिस्ट पार्टी (नेकपा) को हेटौंडा उपमहानगरपालिका समिति एकता विस्तार बैठक सम्पन्न भएको छ। नेकपाका पूर्व घटक पार्टी नेकपा (माओवादी केन्द्र) हेटौंडा उपमहानगरपालिका समितिका अध्यक्ष प्रदीप अर्यालको सभाध्यक्षतामा सम्पन्न बैठकमा संविधानसभा सदस्य प्रल्हाद लामिछाने प्रमुख अतिथिका रूपमा उपस्थित हुनुहुन्थ्यो।
कार्यक्रममा नेकपाका पूर्व घटक दल नेकपा (एस) र नेकपा (माओवादी केन्द्र) का केन्द्रीय, प्रदेश, जिल्ला, नगर तथा वडास्तरका नेता तथा कार्यकर्ताहरूको उल्लेख्य उपस्थिति रहेको थियो।
बैठकलाई सम्बोधन गर्दै प्रमुख अतिथि लामिछानेले राजसंस्था पुनःस्थापना भए जनताको लोकप्रिय मतबाट आम नागरिकका छोराछोरीले राष्ट्रपति र प्रधानमन्त्री बन्ने अवसर गुम्ने दाबी गर्नुभयो। उहाँले भन्नुभयो,
“एउटा वंशले राज्य गर्दा आम नागरिकले बोल्ने अधिकार थिएन, आफ्ना भावना व्यक्त गर्न पनि अनुमति लिनुपर्थ्यो। लोकतान्त्रिक गणतन्त्रले त्यो अवस्थाको अन्त्य गरेको छ।”
उहाँले छरिएर रहेका कम्युनिस्ट शक्तिहरू एकजुट भएर देश जोगाउने समय आएको उल्लेख गर्दै अब छुट्टाछुट्टै नारा, जुलुस र आमसभा नगरी एकताबद्ध रूपमा अघि बढ्ने प्रतिबद्धता व्यक्त गर्नुभयो। साथै, ढिलै भए पनि देशका लागि चुनाव आवश्यक रहेको धारणा राख्नुभयो।
हेटौंडा–४, गर्दोईस्थित पार्टी कार्यालयमा सम्पन्न कार्यक्रममा नेता सन्तोष न्यौपाने, देवराज गौतम, सागर बानियाँ, लक्ष्मी पाख्रिन, बिबेक राई, पार्टीका नगर इन्चार्ज धुर्बबहादुर भुजेल, नेता केदारनाथ दुलाललगायतले मन्तव्य व्यक्त गर्नुभएको थियो।
